A Asociación Sindical Galega de Guionistas renova a súa directiva con forte presenza femenina

Un equipo liderado por mulleres continuará coa defensa dos dereitos das e dos guionistas galegos

A Asociación Sindical Galega de Guionistas (AGAG) anuncia a renovación da súa xunta directiva para o período 2025-2027, destacando a presenza maioritaria de mulleres en postos clave.

A nova directiva combina continuidade e renovación, contando con tres membros que permanecen no equipo e tres novas incorporacións. Ángela Andrada asumirá a presidencia, acompañada por Ángel Manzano como vicepresidente e Sara Varela como tesoureira. Incorporándose nesta etapa, Clara Coira que exercerá como secretaria, mentres que Eire Cid e Álex Cancelo asumirán os cargos de vogais.

Con máis de 100 persoas socias, a nova xunta directiva reafirma o seu compromiso co desenvolvemento profesional das guionistas e dos guionistas galegos, ao mesmo tempo que traballará na defensa dos dereitos e intereses ante institucións públicas e foros onde se toman decisóns que afectarán ao conxunto da profesión.

Pendentes sempre da escasa visibilidade das mulleres guionistas e da falta de paridade nas salas de guión, esta nova xunta directiva liderada por mulleres, asume o compromiso de impulsar o cambio e promover unha maior equidade no sector.

Desde AGAG, agradecen o traballo da anterior directiva e animan ás persoas socias a participar activamente nesta nova etapa de crecemento e consolidación da asociación.