Guionista e directora viguesa. É Doutora en Comunicación e Información Contemporánea, especializada en Teoría Fílmica Feminista; Premio Extraordinario de Máster en Educación, Xénero e Igualdade e está graduada en Comunicación Audiovisual. Completou a súa formación con diversos cursos de especialización en guión e participou en comités de selección de proxectos para laboratorios de desenvolvemento. Durante varios anos compaxinou a investigación académica en cinema coa creación audiovisual. Na actualidade traballa como freelance en diversos proxectos audiovisuais de distintos formatos e desenvolve a súa ópera prima, “Os reis imaxinarios”.